雖然講極意佬都唔認同520同我愛你有乜關連，不過都係咁二出去食個飯應酬下我咁喎。
去到星期五餐廳，其實都係例牌菜食吓漢堡包薯條，飲吓啤酒睇吓電視轉播足球咁。茶實加埋餐廳loop住嘅pop都有啲嘈，就喺呢個時候一對銀髮公公婆婆出現在我哋面前......
一個恤咗髮戴著珍珠耳環嘅婆婆，佢碎步用咗99秒9由門口行到我哋幾張枱前嘅位置，身後老公公就棟住支拐杖到婆婆座位面前，小心翼翼地幫婆婆拉開座位，婆婆緩緩坐下。公公戴起金絲老花眼鏡，笑笑口讀餐牌俾婆婆聽然後夾下點咩菜好。兩老點咗兩份漢堡包薯條，公公唔怕生冷嘢叫咗杯draught.
公公雖然棟住拐杖但仍坐唔定，一時騰去洗手間一時又百厭自己騰去汽水機攞水飲。未幾，食完個包就叫左碟甜品兩老share嚟食，仲時不時舉杯cin cin cheers。
兩老旁邊嘅一切頓然放慢了百倍，就好似時間突然識得停落嚟咁。
光陰似箭 日月如梭。意佬眼仔碌碌咁望住我話：時間真係唔等人，你睇吓佢倆頭髮都白哂，老到屐屐聲都無懼瞬息萬變嘅社會，繼續享受屬於佢哋嘅二人世界。我希望到我哋七老八十時，我都可以好似公公咁，帶你去食漢堡包薯條，陪你睇NBA, 不過唔知你會唔會嫌我太老行得太慢？
傻佬，到時候我都老到巢哂皮，你唔嫌我醜，你行得比螞蟻更慢又有乜所謂？仲好，我可以拖住你隻手耐啲。
一言為定，我捉唔住時間，但呢世無論我去到邊都會捉實你雙手。
#時間真係唔等人
#老到冇牙都要食漢堡包薯條
Search